antxetamedia.eus

antxetamedia.eus jarioa-rako harpidetza egin
Eguneratua: duela ordu 1 6 min

Irun Hiria Krossak 50 urte beteko ditu

Az, 11/14/2018 - 10:26

Txingudi Ikastolako lurretan, kadete, benjamin, infantil, alebin,  senior  eta beteranoen neska eta mutilen artean, 700 gora korrikalarik parte hartuko dute 13 lasterketetan.

Bidasoa Ateltiko Taldeak antolatzen dituen lasterketa ororen artean kuttuna da. Eta 50. urteotan bertan irabazi duten kirolariak omenduko dituzte udaletxean, aurreko egunean egingo zaien harrera ofizialean. Haien artean, zazpi olinpiko daudelarik. Jose Mari Sarriegi, Bidasoa Atletiko Taldeko sortzailea eta klubeko ohorezko presidentea. 

Azaroaren 19an abiatuko da FICAB Bidasoako Nazioarteko Zinemaldi Arkeologikoaren 18. edizioa

Az, 11/14/2018 - 10:25

Kultur arloan, azaroaren 19an abiatuko da FICAB Bidasoako Nazioarteko Zinemaldi Arkeologikoaren 18. edizioa. Oiasso Museoak eta Arkeolan Fundazioak xumeki sortutako festibala adin nagusi bilakatu da dagoeneko, eta aurtengoan sekulan izandako sari, areto eta dokumental gehien bilduko ditu bere baitan.

Orona Fundazioak babestutako Heziketa Sailean 14 emanaldi eskainiko dituzte Hernaniko Orona Fundazioan eta Irungo CBA kulturgunean, hitzaldiak arkeologo eta film dokumentaletako zuzendarien eskutik. Eta sail ofizialean, 22 dokumental izango dira guztira. Aurten 89 lan jaso dituzte, eta 36 ikusi ahal izango dira festibalean. Aipatutako lekuetaz gain, Amaia Kultur Zentroa izango da areto nagusia, eta aurten Donostiako Aquariumari esker, Donostiara hedatuko da FICAB festibala.

Museo garrantzitsuetako zuzendariek, nazioarteko arkeologo ospetsuek eta zinemagileek osatutako goi mailako epaimahaia osatu dute gainera, eta Marijo Noain, Oiasso Museoko kide eta festibaleko zuzendariak esplikatu digunez, interes eta garai historiko guzietarako filmak eskainiko dituzte. Euskal Herriko indusketa arkeologiko bakarra izango da aldiz.

Izan ere, Donostiako Aquariumean hiru emanaldi izango dira. Urtebeteko hutsune baten ondotik, itzultzen da FICAB Irundik Donostiara. Esther Hirogoy, Aquariumeko zuzendariak esan digunez, ateak beti zabalik izan dituzte, baina itsasoari lotutako arkeologiaren berri ematen duten lanak soilik onartzen ahal dituzte.

Gainerakoan, aipatu ere, “La Cueva de los sueños olividados” filma 3D formatoan proiektatuko dutela itxiera ekitaldian. Lehen aldia izango da, FICAB festibalean izan ezik, Amaia Kultur Zentroan ere. Xehetasun guziak www.ficab.org

 

Hondarribiko udalak 118 etxebizitza babestu eraikitzeko hitzarmena izenpetu

Az, 11/14/2018 - 10:09

Hondarribiko Udalak jakitera eman duenez, Presa 1 eta Presa 2 orubeetan 118 etxebizitza babestu eraikitzeko hitzarmena izenpetu berri du Eusko Jaurlaritzako VISESA sozietatearekin.

Joan den udan iragarri zuten bezala, promozioa bi arlotan garatuko da, baina guztien %63a alokairu sozialera bideratuko da. Herritarrek hori galdegiten dutela ikusirik, Udalak lurra eskaintzeaz gain, 864.000 euro ordainduko dizkio VISESAri alokairura bideratuko diren etxeen eraikuntza ekonomikoki bideragarria izan dadin.

Etxebizitzak eskuratu ahal izateko, Hondarribian gutxienez urtebetez erroldatuta izan beharko da etenik gabe, edo azken 10 urtetan 5 urtez etenak eginez. Bestalde, promozio honetan, 3.530 metro karratu aparkaleku eraikiko dira Presa 1 orubearen lurrazpian. Aparkalekuak Udalari entregatuko zaizkio, eta aztertzekoa dute oraindik, zein kudeaketa eredu izango duen.

51.618 herritar daude deituak bozkatzera, igandeko herri galdeketan

Az, 11/14/2018 - 10:02

Irungo 16 urtetik gorako 51.618 herritar daude deituak bozkatzera, heldu den igandean ospatuko den herri galdeketan. Pentsamolde eta eta kolore ezberdinen arteko ehunka herritarrek eraman duten bi urteko gogoeta eta eztabaida prozesuaren emaitza izango da igandekoa. Hastapenean ekimena babesteko bildutako 3.800ndik gorako sinadura bilketa, galdera bera zehaztea, edota hilabeteotan egindako kanpainaren ondotik, aldiz, herri galdeketa antolatzeko ere, ehunka lagun mobilizatuko dira auzoz-auzo bozkalekuak bermatzeko. Ander Errazkin, bozkaleku edo mahaietako lantaldearen arduraduna da, eta antolaketarako ahalegina itzela izan dela epslikatu digu.

Oroitarazi behar baita, larunbata eta igandez, San Juan plazan adin guzietarako animazioak, tailerrak, kontzertuak barrikote eta parrillada eta jarduera ezberdinak antolatu dituztela, igandean 20:00etatik aurrera, bozken kontaketa jaiarekin borobiltzeko.

Igandean bozka emateko, aldiz, goizeko 9:00etatik iluntzeko 20:00ak arte izango da. Bolondresekin batera, abokatu, legelari eta politilogo talde batek osatutako berme taldeak legez egiten dela segurtatu, eta sistema informatiko baten bidez bermatuko dute bozkak errepikatzen ez direla. Auzoz-auzo, bozkalekuek edozein hauteskunde ofizialek duten berme berbera izango dute.

Etxetik eraman behar den bakarra, dokumentazioa eta irribarrea dela oroitarazi dute. Eta azken momenturako ez uzteko ere gomendatu du Hartu Hitzak. Berez, bozka aurreratua emateko aukera ere badago, lanegunetan, arratsaldeko 18:00etatik iluntzeko 21:0etara, Arbelaitz kaleko Hartu Hitzaren egoitzan. Irungo Atsegina elkartearen aldalmenean.

Haurrekin dugun komunikazioa Munduko Haurraren Eskubideen Egunean mintzagai

Ar, 11/13/2018 - 11:56

Azaroaren 20ean, Munduko Haurraren Eskubideen Eguna ospatuko dela aprobetxatuz, Irungo Udalak Haurtzaroaren Ongizateari buruzko jardunaldia antolatu du azaroaren 24an Palmera Montero gunean.

Haurrek naturarekin harremanetan, jolas librean aritzeko duten eskubidea, haien garapenerako ezinbestekoa dela nabarmendu dute. Horren harira, Familian jolasteko tailerrak, pintxo-pote bat eta bi adituren hitzaldiak proposatzen dituzte.

Itziar Arregi pedagogaren eskutik, jolas libreari buruzkoa. Eta Miren Camison, haurtzaroan adituarena. Honek esan digunez, helduok haurrekin dugun komunikazioari buruz hausnartaraztea du helburu.

Jardunaldia Palmera-Monteron izango da azaroaren 24ean, goizeko 11:00etatik aurrera, eta dohakoa bada ere, aldez aurretik izena eman beharra dago. Horretarako azaroaren 14tik 22ra bitartean, irun.eus Udalaren webgunean egin daiteke.

 

Urruñako Ikastola eta Ziburukio Piarres Larzabal kolegioaren aldeko kontzertua eskainiko du Kalakan taldeak

Ar, 11/13/2018 - 11:51

Kalakan taldeak kontzertu berezia emango du Urruñako kiroldegian azaroaren 25ean. Urruñako Ikastolak eta Ziburukio Piarres Larzabal kolegioak antolaturik, haien aldeko emanaldia izanen da.

Xan Errotabeherek, Jamixel Bereau-k eta Pierre Sanglak, XV. mendetik gaur egunerainoko kantuak eskaintzen dituzte, ahotsa eta perskusioak baliatuz, euren konposizioei ere lekua eginez. Horrela, euskal kultura milenarioaren modernitatea orainean idazten dute, txalaparta, txirula, tobera, pandero, xilintx... eta Indiatik etorritako harminioa.

Kanariari irletan eta Letonian kantatu ondotik, egunotan Euskal Herrian dira. Eta joan den igandean Irunen emandako kontzertuaren ondotik, aste hontan,  Donostiako Tabakaleran izanen dira, azaroaren 25ean, arratsaldeko 16:00retan Urruñako kontzertua eskainiko dutelarik.

Kalakaneko Xan Errotabehereri galdetu diogu, ea Euskal Herrian, etxean aritzea atsedena den haiendako, edo ardura bikoitza ekartzen dien.

Urruñako Ikastola eta Ziburuko Kolegioaren aldeko emanaldia, azaroaren 25ean, arratsaldeko 16:00retan izanen da. Kitorik izanen da 16 urtez behekoentzat, eta gainontzekoentzat txartelak 12 eurotan dira aintzin-salmentan, eta 15 eurotan egunean berean. Kontzertuaren ondotik, taloak eta ostatua KUXKUXTU txarangak animaturik.

Irun, Donostia, Zalla, Balmaseda eta Alonsotegiko Gure Esku Dago herri dinamikaren ordezkariek igandeko herri galdeketetan parte hartzeko deia egin dute

Ar, 11/13/2018 - 09:45

Hain da handia indar hori, heldu den igandean 2.000 lagun inguru ariko direla lanean bolondreski, bost herri horietako galdeketak posible egiteko. Iruen, zehazki, soilik 16 bozkalekuak bermatzeko 300 lagun inguru.

Horrenbeste herritarren artean, galdeketa bat era autonomo eta autofinantzatuan antolatzea garaipen handia dela nabarmendu dute ere. Eta berme guztiak dituela. Sistema informatiko baten bidez, bozka errepikatuak sahiestuko dituztelako batetik, eta bestetik, berme talde bat osatu dutelako abokatu, legelari eta politologo talde batekin. Gainera goi mailako begiraleak etorriko dira Euskal Herrira, Kataluniatik, Eskoziatik eta Argentinatik.

Gogoratu, heldu den igandean, 16 urtetik gorako 51.618 herritar daudela bozkatzera deituak Irunen, eta 300 bolondres inguru mobilizatuko direla 14 auzoetan antolatutako 16 bozka mahaiak kudeatzeko.

Angel Oyarbide: "Klitxe asko gainditzen eta bere kasa erortzen ari dira"

Orain artean 200ndik gora herrietan egin dira herri galdeketak, %23ko partehartzearekin. Hala, Irun bezalako hiri handiago batean antolatu ahal izateak suposatzen duenari buruz galdetu diogu, Anjel Oyarbide, Gure Esku Dagoko bozeramale nagusiari.  

Edozein kasuetan, Irungo herri galdeketa urrats bat gehiago baino ez dela dio Anjel Oyarbidek. Izan ere, bozkaren emaitzatik haratago, irundarrek hau gauzatzeko egin duten bi urteotako ibilbidean ikasi eta eraikitakoa da garrantzitsuena.

 

Irungo EAJ alderdiak, Jose Antonio Santano alkate izaten jarraitzeko gaitasuna duenik zalantzan jarri du

Al, 11/12/2018 - 09:25

Joan den ostiralean Korrokoitz eremuaren inguruko Ikerketa Batzordearen azken bilera egin zen, ondorioen aktak onartzeko azken saioa. Iada, Korrokoitz aferan Xabier Iridoy Hirigintza ordezkari zenean, Santanok honen lanari eta pertsonari buruz susmo eta akusazio faltsuak egin zituela onartuta, udalbatzan alkatea gaitzetsi egin zuen oposizioak. Eta jeltzaleek alkatearen dimisioa eskatu zuten hilabete luze dela. Orain artean inolako erantzunik jaso gabe.

Xabier Iridoyren ustetan, Santanoren jarrerak Irun hiriari kalte egiteaz gain, bere borondate demokratiko eza agerian utzi du.

Asteburu honetan 9 migrante erakunde publikoek martxan jarritako zerbitzuetatik at lo egin dute

Al, 11/12/2018 - 09:20

Irungo Harrera Sareak jakitera eman duenez, asteburu honetan 9 migrante erakunde publikoek martxan jarritako zerbitzuetatik at lo egin behar izan dute. Jakin izan dugunez, EH Bilduk utzitako bere egoitzan lo egin behar izan dute. 

Ospitale Zaharreko Hotzaren Kontrako Dispositiboan diren 24 oheak eta Gurutze Gorriak kudeatzen dituen Martindozenea aterpetxeko 60ak beteak omen zirelako geratu dira kanpoan. Omen diogu, Irungo Udalak ez diolako Harrera Sareari modu zuzenean eta egunero informatzen.

Anartean, Harrera Sareak Irungo hiri-erdiko San Juan plazan harrera laguntza puntuan segitzen du kale-gorrian, eta egoitza bat galdegiten dute Iruna heltzen diren migratzaileei lehen harrera baldintza egokietan emateko.

Bestalde, azken asteetan Hendaiako mugan polizia frantsesak egiten dituen kontrolak zorroztu egin dituztela, eta beroan itzulketak emendatu egin direla salatu dute.

Muga gainditzea geroz eta zailagoa dute beraz migratzaileak, eta negu gorria hurbiltzen ari den honetan, migranteen kopurua apaldu baino emendatzen doa. Harrera Sareak nabarmendu du, zentzu honetan Gurutze Gorriak, Eusko Jaurlaritzak eta Irungo Udalak martxan dituzten zerbitzuak ez direla aski. Aldiz, heldu berriak diren zein frantses poliziak beroan itzulitako trantsitoan diren migranteen sarrera irizpideak malgutu egin dituzte aterpetxeetan.

Bien bitartean, Harrera Sareak oroitarazi du, S eta M tailako gizonezko arropak, eta neguko eskularru eta berokien beharretan direla. Astearte eta ostegunero Kale Nagusiko 14.ean jasotzen dituzte 17:00etatik 19:00etara. Eta era berezan, migranteek telefono mugikorrak ere behar dituztela, libreak eta fabrikatik etorritako moduan garbi edo formateatuak.

Azken 40 urteetako zinegotzi, batzarkide, alkate eta senatari irundarrek sustengua adierazi diote herri galdeketari

Al, 11/12/2018 - 09:08

Irungo azken 40 urteetako hautetsiek eta gipuzkoako aldundiko junteroek agerraldi bateratu bat egin dute San Juan Plazan Irungo Herri Galdeketa babesten dutela adierazten eta Irungo herritarrak bertan parte hartzeko animatzen. 

Heldu den igandean, 16 urtetik gorako 51.618 herritar daudela bozkatzera deituak Irunen, eta 300 bolondres inguru mobilizatuko direla 14 auzoetan antolatutako 16 bozka mahaiak kudeatzeko.

Aldez aurretik, aste honetan zehar oraindik bozka aurreratua emateko aukera ere bada, astelehenetik ostiralera 18:00etatik 21:00etara, Arbelaitz kaleko Hartu Hitzaren egoitzan. Irungo Atsegiña elkartearen aldamenean.

Aroa Merino kanariarrak eta Jaume Leiva katalanak eraman dute Behobia-Donostia lesterketaren txapela

Al, 11/12/2018 - 09:08

Aroa Merino kanariarrak eta Jaume Leiva katalanak eraman zuten atzo Behobia-Donostia erdi maratoiaren txapela. Aroa Merinok hirugarren aldiz jarraian nagusitu zen Donostiako helmugan, eta aurten gainera, ibilbide berriko markarik onena egin zuen, ordubete, bederatzi minutu eta 44 segundo. Jaume Leivak, aldiz, ordubete eta 22 segundutan gelditu zuen kronoa.

Lehen euskalduna Iraitz Arrospide villabonarra izanda da, bigarren sailkatua gizonezkoetan. Bidasotarrei dagokienez,  azkarrena, Jose Antonio Gomez de Arriba izan da, 18. sailkatua, ordubete, zazpi minutu eta bi segunduko marka eginez.

Gerardo Amunarriz hondarribiarrak, aldiz, ordubete zortzi minutu eta 49 segunduko markarekin, 29. sailkatu zen atzo, hondarribitarrik azkarrena. Eta lehen hendaiarra, Mikael Duhart izan da, ordubete, 14 minutu eta 34 segunduko markarekin.

Herriko bestak tartean zituztela, bi biriatuarrek baino ez dute parte hartu aurten. Halere, ordubete 15 minutu eta 52 segunduko marka egin du Ismael Urrutiak.

Aurten ere Bizi Bixi programarekin bat egin du Hondarribiak

Or, 11/09/2018 - 09:30

Ikasturte honetan ere, Bixi Bizi programarekin bat egin du Hondarribiko Udalak. Kirol Departamenduak jarduera fisikorako orientazio zerbitzua abian jarri zuen pasa den maiatzean, pertsona inaktiboei aholkularitza eskaintzeko. Izan ere, Gipuzkoarren %71ak egiten du jarduera fisiko aski, baina oraindik ere, hamarretik hiru herritar dira, sedentariotzat jo daitezkeenak.

Hain zuzen ere, inaktiboak aktibatzeko, kirol edo jarduera fisikoa sustatu eta gizarte osasuntsuago bat lortzeko helburuarekin, Julen Fernandez prestatzailea arduratzen da Hondarribian nahi duen orori eta inolako adin mugarik gabe, ondoen egokitzen zaizkion jarduera eta ohiturak gomendatu, eta ondorengo jarraipena egiteaz.

Eusko Jaurlaritza eta Gipuzkoako Foru Aldundiarekin elkarlanean, programa hau, EAE mailan kokatzen den MUGIMENT Plan Estrategikoaren baitan garatzen ari dira, Hondarribian bezala, beste 20 bat udalerritan ere.

Horren baitan, herritarren jarduera fisikoa sustatzeko, hedabideen, osasun zerbitzuen eta hezkuntza zentroen bidez ere, gizarte aktibo bat bultzatu, ikastetxeetan jarduera fisikoa egunero bermatu, turismo aktiboa sustatu, emakume gehiago kirola egitera animatu edota hiri diseinuak oinezko eta bizikletentzako egokitzeaz gain, kirolerako aukerak garatzean datza estrategia.

Hondarribiari dagokionez, jarduera fisikorako baliabidde anitzekoa eta egokia dela oroitarazi dute, eta horregatik aukeratu dute orientabide zerbitzuaren programa bertan garatzeko. Iñaki Iturrioz, Foru Aldundiko Kiroletarako ordezkariaren arabera, gizarte osasuntsuago bat lortzeko, eta adinekoen kasuan ere, zahartze aktiboa bultzatzeko, jarrera aldaketa bat bilatzen du programa honek.

Hartara, Hondarribian bi orientabide bulego martxan dira joan den maiatzaz geroztik. Eta ikasturte honen ere, Itsas Etxeko osasun zentroan edozein pertsonak bere medikuaren bitartez hitzordua hartu dezakeelarik. Eta bigarrena, Jostaldi pilotalekuan. Hitzordua hartzeko 943 11 12 26 telefonora deitu, edota idatzi bixibixihondarribia@gmail.com posta elektronikora.  

30.775 korrikalarik Behobia-Donostia erdi maratoiaren 54. Edizioan parte hartuko dute

Og, 11/08/2018 - 09:51

Antolatzaileek jakinarazi dutenez, 2015ean jo zuten goia 34.000 parte-hartzailerekin, eta orduz geroztik kopurua pixkanaka apaltzen joan bada ere, bosgarren urtez jarraian 30.000ko langa igarotzea lortu dute.

Aurten, aldiz, hainbat berrikuntzarekin dator Behobia-Donostia, eta milaka bisitari-korrikalariek lasterketaren inguruan sortzen duten giroa, inoiz baino gehiago Irunen bilduko da.

Iñigo Etxeberria, Fortuna kirol elkarteko lasterketaren korrdinatzailea.

(SOINUA_Behobia_Donostia_lasterketa_berritasunak_Iñigo Etxeberria)

Segurtasun aldetik ere, bada berrikuntzarik. Aurten lehen aldiz, dortsalek QR kode bat izango dutelako, eta horri esker korrikalarien fitxa eta osasun datuak jaso ahalko dituzte modu erraz batean, osasun profesionalek esku hartu behar izanez gero lana arintzeko.

Kalakan eta Nayade abesbatzak elkarrekin abestuko dute

Og, 11/08/2018 - 09:51

Mundu  zabalean ezaguna den Iparraldeko Kalakan hirukoteak kontzertu berezia emango du Irungo Junkal elizan igande hontan. Irungo Nayade abesbatzarekin hainbat asteetan zehar eramandako elkarlanaren emaitza aurkeztuko dute. Izan ere, bidasotarrentzat espreski prestatu eta ekoiztutako errepertorioa landu dute.

Kalakan taldeko Jamixel Bereau-k esplikatu digunez, Madonarekin ez ezik, Euskal Herrian eta mundo zabalean bildutako esperientzia guzietatik, lehendabiziko aldia da emakumezkoen ahotsez osaturiko abesbatza batekin taulagainean ariko direla. Eta Kalakan taldeko kideentzako biziki aberasgarria izan dela dio.

ontzertua dohainik izango da, Irungo Junkal elizan, igande hontan arratsaldeko 19:00retan.

Ondare kultur elkarteak sei erraldoi berri aurkeztuko ditu

Og, 11/08/2018 - 09:51

Ondare Kultur Elkarteak prest dituen sei erraldoi berriak aurkezteko, Irungo historian zehar ibilbidea egingo duen ikusgarri berezia eskainiko du Amaia Kultur Zentroan, heldu den larunbatean, arratsaldeko 19:00retan.

Sekretupean dauzkate oraindik, sei erraldoi berriak zein pertsonai irudikatzen duten. Iruñeako Baina izena badute, Maite, Nicolas, Txema, Juncal, Lupe eta Joxe. Eta Ondare elkarteak hastapenetik izan duen helburueri lotuz, Irungo historian zehar esanguratsuak bilakatu diren pertsonaiak izango dira.

“Irun, Historia Erraldoia” izenburupeko ikusgarria, larunbatean arratsaldeko 19:00retan izango da, dohainik. Baina dagoeneko, 600 lekuetatik ehun bat baino ez dira geratzen, eta Amaiako leihatiletan banatuko dituzte, larunbatean bertan, arratsaldeko 18:00etatik aurrera.

Ekitaldian erraldoi berriak ezagutzeko aukerarik ez baduzu, lasai, ze abenduaren 29an Gabonetako kanpainaren baitan kalera aterako dituzte aurreneko aldiz.

Datorren urteari begira ere, erraldoi gehiago egiteko asmoa dute, Irungo historia eta tradizioari lotuak, erromatarrak, Porcelanas Bidasoa edota Real Unioni keinuak eginez. Baina momentuz, eta sei erraldoi berri hauei esker, Irun erraldoien hiria ere bilakatuko dela nabarmendu du Iñigo Mangasek

Gogoan hartu behar baita, Ondare elkarteaz gain, Bidasoaldeko Erraldoiak eta Irungo Atsegiña elkarteak ere erraldoiak badituztela. Bukatzeko aipatu ere, jaietako animaziorako izan ezik, Ondare elkarteak tresna pedagogiko gisa ere baliatu nahi dituela erraldoiak, eta dagoeneko Irungo hainbat eskolekin bisitak hitzartu dituzte, Irungo historia garaikidea lantzeko. Era berean, une hontan 50 haur biltzen ditu elkarteak bere erraldoi eta buruhandien eskolan.

Hondartzako Posta bulegoaren hestearekin kolpe berria jasoko du Hendaiak

Az, 11/07/2018 - 11:18

Estatu frantses osoan ez ezik, Ipar Euskal Herrian ere hainbat posta bulego hesten ari dira. Joan den hilabetean Pausun gertatu bezala, heldu den urte hastapenean Hendaiako hondartza inguruetan kokatua den bulegoarekin gauza bera eginen du La Poste-k.

Kotte Ecenarro Hendaiako auzapezak gutun bidez jakin zuen hondartza inguruetan kokatua den posta bulegoa heldu den urtearen hastapenean hetsiko dutela. Gutunean posta bulegoko zuzendari nagusiak auzapezari hitzordu bat proposatu dio eta hau “behin kaltea egina izan denean” heldu dela deitoratu du Ecenarrok.

La Poste-n zuzendaritzak bulegoaren hestea zerbitzuaren erabilera apaldu delako justifikatu du. Hendaiako auzapezak ez du berdin ikusten. “Hondartzako bulegoak Hendaian urte osoan bizi den jendeari baitezpadako zerbitzua ematen dio. Hestearekin hutsune bat sentituko dugu”, erantsi du. CGT sindikatuak, bere aldetik, zerbitzu hori herritarrentzat beharrezkoa dela adierazi eta hiru ordutan 200 izenpetura bildu zituen antolaturiko petizioan

Hendaiako bulegoaren hestea azken urteetan La Poste Estatu frantsesean gauzatzen ari den plan oso baten baitan kokatzen da. Behin bulegoa hesten dutelarik, posta zerbitzua auzo mailako supermerkatu ttipi batek eskainiko du. La Poste-n zuzendaritzaren arabera, ordezkapen honekin erabiltzaileek ordutegi zabalagoa izanen dute. 

Garapen Agentziak 30.000 euroko inbertsioa egin du, Makers proiektua garatzeko

Ar, 11/06/2018 - 10:19

Bidasoa Bizirik garapen agentziak, aldiz, teknologia berrien aldeko apustua egin du, enpresa eta ekintzaileak diren pertsonei MAKERS izeneko programan parte hartzera animatuz.

Palmera-Monteron auzunean dagoen Irun Factory gunea, ikerkuntza, formakuntza eta ekoizpenerako espazio bilakatuko dute astelehenero, eta urte bukaera arte. Connect Innovation Bai! proiektuaren baitan, nahi duen orok 3D inpresio, elektronika digitala eta analogikoarekin trebatzeko aukera izango du. Inpresora berritzaile hauekin, objektu fisikoak sortu ahal dituztelarik.  

Garapen Agentziak 30.000 euroko inbertsioa egin du proiektua abian jartzeko, Europak ekimenaren %65a diruztatzen duelarik,

Ekimen honi esker, 3D eskanerrak eta 3D inprimagailuen teknologiarekin  trebatzeko aukera izango da tutore baten laguntzarekin, astelehenero 15:30etatik 19:30era, Irun Factory gunean proposatuko dituzten jardunaldietan. 

Bestalde, hilabete honetan bertan, Ducoureau jauregian dagoen Bidasoako Coworking gunera batuko diren zortzi ekintzaileentzat, beka berri bat luzatu du Bidasoa Bizirikek. Sei hilabeteko formakuntza abiatuko dute ideia berritzaileen definizio eta garapenerako prozesuan.

Beldur Barik programaren 5. edizioa aurkeztu dute

Ar, 11/06/2018 - 10:04

Egungo gizarte matxista, berdinago batean transformatzeko helburuarekin, Beldur Barik programaren 5. edizioa aurkeztu dute gaur Irungo Udaleko Ongizate eta Hezkuntza arloek.

EAE mailan antolatzen den 12 eta 26 urte arteko gazteei zuzendutako indarkeria sexistaren kontrako bideo-lehiaketa proposatzen dute batetik. 300 euroko erosketa txartelekin saristatuko dituzte bideorik onenak, 12-17 eta 18-26 urte arteko kategorietan. Flashmob, laburmetraiak, dantzak, antzerkiak izan daitezke, baina bideoz grabatuak. Eta lanak entregatzeko www.beldurbarik.org webgunean egin beharko da azaroaren 9a baino lehen. Irungo lan guztiak, Amaia Kultur Zentroan eskainiko dituzte azaroaren 25ean.

Baina Beldur Barik programak badu alderdi pedagogikoa ere. Aurten Eguzkitza, San Vicente de Paul, Toki Alai, El Pilar eta Hirubideko 377 ikaslek ordubeteko hiru sentsibilizazio saioetan parte hartuko baitute.

Aitziber Iratzoki, Irungo Udaleko Berdintasun teknikariak esplikatu digunez, berdintasun gaietan eskarmentu handia duten bi psikologoen eskutik, gazteengan eragiten dute mikromatxismoak, eta sare sozialetako cyber-kontrola edota genero rolei buruz jardungo dute.

Berdintasuna, errespetua, norbere buruaren autonomía, eta gizarte patriarkalaren ereduak apurtzeko tresnak gaztarotik eskaintzea, etorkizuneko gizarte berdinago baten giltzarri izan daitekeelakoan, 377 ikaslek parte hartuko dute, horietatik 186 neska, eta 191 mutil.

Nafaroa, Gizpuzkoa, Ipar Euskal Herria eta Aragoiko larrialdi zerbitzuak ALERT proiekuaren bidez koordinatuko dira

Ar, 11/06/2018 - 09:57

ALERT, izen honekin aurkeztu dute Nafaroa, Gizpuzkoa, Ipar Euskal Herria eta Aragoiko lurraldeak batzen dituen larrialdietarako proiektua.  Lau lurraldetako larrialdi zerbitzuetako ordezkari eta arduradunak Irungo FICOBA erakust azokan bildu dira astelehen hontan. Bertan, garraio kamioi baten istripu simulazio ariketa bat egin dute. Interbantzio honetan Irun eta Hendaiako suhiltzaileak parte hartu dutelarik.  Ondoren bilkura bat egin dute eta Larrialdi egoera baten aurrean ALERT proiektua osatzen duten erakundek beharrezkoak diren baliabideak jartzeko konpromezua hartu dute. Telefono zerbitzuak koordinatu, eta kartografia eta segurtasun plan komunak osatuko dira, hizkuntza ezberdinak kontuan hartuz.

San Miguel-go bizilagunek Auzo Planaren ildoak eztabaidatu, planifikatu eta erabakiko dituzte

Ar, 11/06/2018 - 09:48

San Migel 2025 Auzo Plana osatzeko prozesua aurkeztu dute gaur auzo elkarteak eta Hiritik At kooperatibak. Iada duela zenbait urte Landetxa-Katean burututako Auzoa Amesten proiektuaren ildo beretik, San Migelgo auzokideek 2025 urtera begira, nolako auzoa nahi duten aztertu, eta planifikatzeko prozesu partehartzaile sakon bat abiatu dute.

Gaur eta azaroaren 20ean, arratsaldeko 19:00retan, San Vicente de Paul ikastetxean bilkura ireki bana egingo dituzte, auzokideek euren arrangurak, kezkak, nahiak eta ikusten dituzten beharrak amankomunean jarri, eta auzo plana osatzeko.

Hiritik At kooperatibak bizilagunak prozesuan lagundu, dinamizatu eta auzo planaren txostena osatzeko lan teknikoa egingo du. Bertako Ibai Esteibarlandak esplikatu digu zein den euren helburua.

Azken asteetan auzo elkarteko zein auzoko eragile ezberdinekin bildu dira, informazioa bildu, eta talde eragilea osatzeko. Eta San Migel Auzoaren egungo egoera sozio-ekonomikoa batetik, eta etorkizuneko erronkak eta aukerak zeintzuk diren ikusirik, izan zitezkeen lan ildo edo arlo guztien artean bost eman dituzte lehentasunetan.

Bost lan ildo horietan, gainontzeko guztietan eragina duten bi transbertsalak eta epe luzeko helburuetakoak direla nabarmendu dute. Auzoaren interkulturalitatea eta genero ikuspegia.

Hau guztia behin esanda, gaurko lehendabiziko bilkura oroitaraziko dugu. San Vicente de Paul ikastetxean, arratsaldeko 19:00retan, eta denei irekia. Halere, gazteei deialdi berezia egiten diete, parte har dezaten.

Orriak