Pasa den astean Eusko Jaurlaritzako Lehendakaritzak, Bake eta Bizikidetzarako Idazkaritza Nagusiaren eta Prospekzio Soziologikoen Kabinetearen bitartez Hondarribiko herritarrek alardearen gainean dituzten jarrerei buruz argitaratutako azterlanaren  harira, Hondarribiko EH Bildutik  honakoa adierazi nahi dugu:

Alde batetik, ikerketa honen emaitzek nabarmentzen duten lehen datu esanguratsua hankaz gora botatzen duela Hondarribiko biztanleen gehiengo zabala alarde tradizional bakar baten aldekoa denaren ustea da.  Emaitzak pare pare jartzen dituzte herriko bi iritziak, batetik tradizionalaren aldekoen kopurua %42 koa eta bestetik, emakumeak alardean parte hartzen duten hainbat ereduren aldeko jarreretan elkartzen direnen kopurua %43koa.

Haatik, ikerketa honetan agerian geratzen den emaitzarik argigarriena eta Hondarribiko EH Bilduk bereziki nabarmendu nahi duena da hondarribiarren %72a  gaur egungo egoera gainditzeko irtenbide berriak bilatzearen alde dagoela. Hau da benetan oso argi geratzen den gehiengo zabal bakarra, eta honenbestez datuok eskuetan hartuta, azken hemezortzi urteotan herriaren bizikidetza baldintzatu duen auzi honi behin betirako konponbidea bilatzea premiazkoa dela deritzogu.

Horrela, beste legegintzaldi bat alperrik pasatzen utzi gabe arazo honi benetako irtenbidea emateko lehenbailehen lanean has dadin eskatzen diogu Alkateari eta bide berean adierazi nahi diogu ere saiakera hori zintzoa bada gure elkarlan eta laguntza guztia eskaintzen diogula auzi honi benetako soluzioa aurkitzeko.