LAB sindikatua Haurreskolak Partzuergoaren mahai negoziatzailetik altxa da, langileei egindako iruzurra salatzeko

: lab.eusLAB.- Gaur, Bilboko Eusko Jaurlaritzako Delegaritzan Haurreskolak Partzuergoaren mahai negoziatzailea bildu da. 2018an Haurreskolak Partzuergoaren langileentzat LAB sindikatuak sinatutako akordioan garatzeke zeuden kudeaketa arloko negoziazioan aurrera egiteko asmoz etorri gara. Izatez, 2018ko akordioa sinatu genuenetik, bere garapena lortzeko helburua izan dugu eta horren alde etengabe lan egin dugu.

Akordioa sinatu genuenetik, kudeaketako langileek eskatzen ziguten moduan, ordezkoen zerrendak zabaltzea lortzeaz gain, Hezkuntza departamentuaren kudeaketako langileen baldintzen ekiparazioa eskatzeko bidea zabaldu genuen. Horretarako, Lanpostuen Balorazio Batzordea osatu eta guztion ekarpen eta lanarekin, proposamen bat landu genuen. Horrez gain, mahai negoziatzailean guztion ekarpenekin kudeaketako langileen ordezkoen araudia, barne sustapenerako araudia eta ordezkapenak egiteko kasuistikaren dokumentuak negoziatu ditugu.

Irailaren 11n, LAB sindikatuak azken ekarpenak egin zituen, departamentu honetako lan kargak txikitzeko lanpostuen zerrenda handituz eta abian jarritako ekiparazio prozesua nola gauzatuko zen zehaztapenak eskatuz. Ordutik, Administrazioaren partetik ez dugu inolako erantzunik jaso eta mahai negoziatzailerik ez du deitu gaur arte. Hori dela eta, gaurko bileran Hezkuntza departamentuko eta Partzuergoko arduradunei exijitu diegu egindako eskaerei ganorazko erantzun bat ematea, kudeaketako langileei zor zaien akordioaren garapena bermatuko duena.

LAB sindikatuak negoziazio kolektiboan sinesten du eta hainbat eta hainbat saiakera egin ditugu akordio batera iristeko, baina une honetan bide guztiak agortu ditugu. Administrazioaren aldetik ez dugu ganorazko erantzunik jaso, ezin esan gabe utzi beren lanak oraindik ere ez dituztela bete. Haurreskolak Partzuergoan, Irakaskuntza publikoko beste sektoreetan gertatzen ari den bezala, haiek sinatutako akordio desberdinak biribiltzeko aurrekonturik ez dutela argi utzi digute, eta, beraz, ez digute beste biderik utzi. Gaurkoan, langileoi egin diguten iruzurra salatzeko, mahai negoziatzailetik altxa gara. Haurreskolak Partzuergoko haurreskolen kudeaketa guztia langile hauen menpe dagoenez, kolektibo osoan izango du eragina, baita familiengan ere.

Bihartik aurrera kudeaketa arloko afiliatu zein gainontzeko langileekin bilduko gara eta denon artean erabakiko dugu zein izango den aurrera egin beharreko bidea eta gure erantzuna.

Etiquetas: