Osasun Bidasoa Plataforma Hiritarra.- Martxo eta apirileko mobilizazioen eta Euskal Autonomia Erkidegorako hauteskundeen ondoren, OSASUN BIDASOAK espero du gobernu berriak Bidasoa eta Bortzirietako eskualdeek dituzten osasun-arretaren arazo larriei helduko diela. Eusko Jaurlaritzako Osasun Sailak gure eskualdeak utzi izanaren egoera historikoak okerrera egiten jarraitzen du azken hilabeteetan, epe labur eta ertainean konponbiderik proposatu gabe.
Itxaron-zerrendak
Ospitaleko kontsulta espezializatu batean artatua izateko edo proba diagnostikoak egiteko itxarote-denborak okerrera egiten jarraitzen du hilabetez hilabete.
Osakidetzak maiatzaren 24an profesional sanitarioei emandako datuen arabera, 7 espezialitatek 60 egun baino gehiagoko itxaron-zerrenda dute. Nabarmentzekoak dira ginekologiarena (167 egun), traumatologiarena (155 egun), otorrinorena (136 egun), kirurgia orokorrarena (123 egun) edo dermatologiarena (75 egun). Gainera, ez dira urologiarako edo Minaren Unitaterako hitzordurik eskaintzen ari. Proba diagnostikoei dagokienez, 4k 60 eguneko itxarote-zerrenda gainditzen dute: TAC-ak 82 eguneko itxarote-zerrenda du, kolonoskopiak 80 eta gastroskopiak 75. Ez dira ekografietarako hitzordurik eskaintzen ari.
Profesionalik eza
Espezialitate batzuetan profesionalak falta dira. Hala nola, urologian (gaur egun zerbitzu propiorik gabe. Arreta Donostia Ospitaleko urologoek ematen dute, modu prekarioan), anestesiak (ekipo kirurgikoak osatzeko zailtasunekin eta Minaren Unitatea artatu ezinik) edo erradiologiak (programatutako ekografiak egin ezinik). Lehen Mailako Arretan familia-medikuak eta pediatrak falta dira absentziak betetzeko. Irun Zentroko gau eta jaiegunetako Lehen Mailako Arretako larrialdi zerbitzuan ez dira txanda guztiak betetzen medikurik ez dagoelako.
Kontsultarako lekurik eza Lehen Mailako Arretan. Irun-Erdialdeko eta Dunboako anbulatorioek espazio-gabezia larriekin jarraitzen dute, barrakoiekin eta kontsulta xeheekin (antzinako bainugelak eta itxarongelak eraldatuta). Bitartean, Osasun Sailak ez du martxan jarri duela 20 urte baino gehiagotik agindutako Irungo hirugarren anbulatorioa eraikitzeko prozesua. Alternatiba gisa, Irungo erdigunean etorkizuneko anbulatorio handi bat eraikitzea proposatu dute (egungo Irun-Erdialdeko anbulategia itxiz). Proiektu honetarako ez dute eraikitzeko oruberik eta Irungo Udalari ez dagoen orube bat exijitzen diote. Haatik, Osakidetzak 2015etik badu orube bat Oinaurren, eta Irun-Erdialdeko anbulatorioa erraz handitu daiteke 1.500 metro koadrotan.
Eskualdeko ospitalean lekurik eza
Ospitalean kontsulta-guneak falta direnez, profesionalen faltarik ez duten espezialitate batzuek (traumatologia, otorrinoa eta kirurgia orokorra, kasu) ezin dituzte pazienteak artatu. Egoera honek itxaron-zerrendak luzatzen ditu, eta arazo larria da herritarrentzat. Ebakuntza-gelak erreformatu gabe daude oraindik, eta aurrera darrai Osakidetzako proiektuak: ospitaleko zatirik berriena eraitsi atxikitako eraikin bat eraiki gabe, nahiz eta eraikin horrek espazioaren arazoa konponduko lukeen, obra gogaikarriak eta alferrikakoak saihestuz.
OSASUN BIDASOAKk arazo horiek konpontzeko eskatu dio Eusko Jaurlaritzako Osasun Sailari, eragindako herritarren eta profesionalen parte-hartzearekin. Osakidetzako Bidasoako gerentearekin eta Osasuneko sailburuarekin bilerak egiteko eskatu da behin eta berriro. Ez Osakidetzak ezta Osasun Sailak ere ez diete eskaera horiei erantzun.
OSASUN BIDASOAKk Bidasoako eta Bortzirietako herritarrak mobilizatzen jarraitzera animatzen ditu kalitatezko osasun-arreta publikoa eskatzeko. Osakidetzaren eta Eusko Jaurlaritzako Osasun Sailaren utzikeria eta elkarrizketarako borondaterik eza salatzen dugu.