SINOPSIA

Talde batean kohesioa lortzea batzuetan ez da erraza, baina beharrezkoa da. Ideiarik gabeko sei aktore hauei kohesiorako bidea irekiko dien egur zati bat aurkeztuko zaie. Zurezko taula honi esker,triziklo bat eta aizkora bat aurkituko dituzte, saskibaloi partida bikaina jokatuko dute eta mikrofono pare batekin casting batean parte hartzeko aukera izango dute. Gainera, eraztun boteretsu baten menpe egongo dira, eta nahi duen begi handi zahar batetik ihes egin beharko dute. Talde honek lortuko al du kohesioa egur zati honen fikzio eta magiari esker?

FITXA

• Konpainia: Kalte Kolektiboa.
• Aktoreak eta sortzaileak: Iholdi Beristain, Oihan Carramiñana, Ander Lacalle, Gaizka Sarasua, Omar Somai eta Eider Villalba.
• Hizkuntza: Euskara.
• Iraupena: 37 minutu.
  
  

AURKEZPENA

Fikziohesioa Jaques Lecoqen ("bande mimée") plataformaren estiloan oinarritutako antzezpena da. Agertokia 1,5m x 2m-ko egurrezko plataforma batera mugatzen da, eta han gertatzen da jolas eszeniko guztia.

Hizkuntza minimalista batekin, gorputzak erdigunean jartzen dira eta lau film ezagun kontatzeko eskaintzen dituzten aukera amaigabeak deskubritzen dira.

Fikziohesioa talde lana da, non aktore bakoitzak pertsonaia desberdinak interpretatzen dituen eta objektu eta espazio bihurtzen den.

Irudimenak paper garrantzitsua jokatzen du antzezlan honetan, ikusleen eta aktoreen arteko jolas mutua sortuz.

TALDEA SORTZEA ETA SARIAK

Kalte Kolektiboa Donostiako Arte Eszenikoen Tailerrean (UTB) ikasten ari ginela elkar ezagutu eta Kolektiboa sortzea erabaki genuen sei aktorek osatutako taldea da.

2023an, Bilboko 6. Pabilioiko antzerki laburreko lehiaketaren hamargarren edizioan parte hartzea erabaki genuen, eta horrela sortu zen taldea eta gure lehen obra,Fikziohesioa.

Lehiaketan Antzerki Interpretazio Onenaren saria jaso genuen.