AHT Gelditu! Elkarlana.- Lehenago EAEko aurrekontuak eta berriki Espainiakoak onartu dira. EAJ eta PPren arteko kromo- trukaketa ikusgarria izan da: PP abstenitu da EAEko  aurrekontuen bozketan  eta EAJk alde bozkatu du Espainiakoetan. Horren ondorioz, bi aurrekontuek aurrera egin dute eta AHTa garaile atera da, beti bezala, EAJ eta PPren inguruko eraikuntza enpresen mesedetan eta politika sozialen kaltetan.

Espainiako aurrekontuei dagokienez, EAJk PPrekin izandako negoziazioetan datozen urteetan “euskal Y”aren finantziaziorako 3.380 milioi € lortzeaz gain,  hiru hiriburuen sarbideen egitasmoa, Lezoko plataforma logistikoa (100 milioi €) eta  Jundizko geltoki intermodala (120 milioi €) adostu ditu,  azpiegitura osoa 2023rako martxan hasteko asmoz. Honetaz gain, EAEk kupoen bitartez azken 5 urteetan ordaindutako 1.400 milioi € Estatuak Eusko Jaurlaritzari itzuliko dizkio, hauetako asko AHTren obretan aurreratutako dirua izanik. Bestaldetik,  EAEko aurrekontueei dagokienez,  Eusko Jaurlaritzak aurten AHTko lanetan 350 milioi € aurreratuko ditu.

Hau guztia gutxi balitz, Nafarroan ere bi urte eta erdiz geldirik izan ondoren, baliteke berriro AHTren lanak datorren urtean hastea, Manu Aierdi EAJko nafar gobernuko presidenteordea  eta Iñigo de la Serna PPko Sustapen ministroaren arteko negoziazioei esker, UPNk akuilututa.

Hego Euskal Herriko eta estatuko alderdi nagusiak (EAJ, UPN, PP, PSOE) beren jostailu kuttuna den AHTa behin eta berriro inposatzen digute.

Espainiako AHTk 25  urte bete ondoren  argi ta garbi gelditzen ari  da azpiegitura suntsitzaile izateaz gain, klasista, xahutzaile, antisoziala eta ohiko trenaren kontrakoa dela.

Zergatik tematzen dira  horrenbeste odoluste ekonomiko zein ekologiko honetan?

AHTren eraikuntzaz politikarien poltsikoak, beren inguruko enpresen poltsak  zein bezero-sareak, egungo hiri eta garapen eredu eta  interes kapitalista oro onuradun bihurtzen direlako.

Hori dela eta, negoziazioen negozioaz, AHT bultzatzen ari diren alderdi politiko oro salatu nahi ditugu. Lurraren txikizioa eta jende xehearen pobretzearen arduradunek izen eta abizenak dituzte. Bada garaia euren erantzukizuna eskatzen hasteko, amildegiaren ertzera iritsi baino lehenago.