Irungo EH Bildu.- Azkeneko bi urteetan ez dugu Alarderik izan, covidak baldintzatutako urte gogor hauetan pairatu dugun beste ondorio bat izan da hau. Egoera honek ekarri dituen zailtasun guztiez gain, aldaketatetarako aukerak ere ireki ditu eta aukera hauek galdu direla iruditzen zaigu. Bi urte galdu dira Alardean berdintasunaren bidean aurrerapausoak emateko.

Zentzu horretan, garaiz gaude oraindik aurten aurrerapausoren bat emateko. Hiru eztabaidagai daude mahai gainean; botoa alderdi guztiek modu bateratuan egitea, udalak eta zehazki alkateak balkoian Alarde parekideari harrera egitea eta udalak Alardea antolatzea. Elkarrizketak elkarrizketa ekainaren azkenetan gaude eta ez da hauetako bakar bat ere adostu. Irungo EH Bildun uste dugu badela garaia festetan berdintasunarekin konpromiso garbia erakusteko, eta konkretuki, gai honekin modu arduratsuan jokatzeko. Irungo udala eta udaleko ordezkariak parekidetasunean eta berdintasunean oinarritzen den festa batekiko babesa emateko ordua iritsi da. Ez dugu zentzu honetan atzerapausorik onartuko.

Festetan Indarkeria matxista egoerekin ardura handia dagoen garai hauetan, agresio kasuek gora egin duten garai hauetan, instituzioei eta alderdi politikoei jarrera garbi eta irmoa erakustea egokitzen zaigu. Berdintasunarekin gaudela ozen esan eta gure jokaerek hori erakutsi beharko lukete.

Horregatik, hiru konpromiso eskatzen dizkiogu Udal Gobernuari:

• Irungo Udalak eta alkateak Alarde Parekideari harrera egin diezaiola.
• San Martzial ermitan egingo den botoan ordezkari publiko guztiek partehartzeko eta Alarde parekidean partehartzen duten pertsonak ere bertan egoteko neurriak har ditzala, ordutegia egokituz.
• Datozen urteetan Alardea udalak antolatzeko pausoak eman ditzala.
  
  

Ausardia eskatzen diegu gure udala osatzen duten alderdi politiko guztiei. Halaber udalbatza osatzen dugun zinegotzi bakoitzari berdintasunarekin dugun konpromisoarekin arduratsuak izan gaitezela eskatzen diogu.