Hendaiako Txiki Txoko haurtzaindegiak 10 urte bete ditu. Eta horren ospatzeko egun osoko egitaraua prestatu dute ekainaren 16an. Hamarkada hontako ibilbidean zehar proiektuaren parte izan diren haur, guraso, irakasle eta eragile desberdinak bildu nahi dituzte. Peio Urriza elkarteko lehendakariarekin mintzatu gira Txiki Txokoren ibilbideaz.

Jaizubia Zaldiketa Eskolan ekintzez beteriko denboraldia izan dute. Zaldiketa bidasotar haur eta gazteen artean normalizatzen ari den kirola delako pozik azaltzen dira klubean, dagoeneko 140 lagun ari baitira eskolan. Asko izan dira antolatutako txapelketak eta topaketak, eta ekainaren 15ean sanmartzialetako XXXIV. Irun Hiria Sari Nagusiarekin borobilduko dute, udako kanpusa prestatzen hasi aurretik. Itziar Urtizbereak, Jaizubia zaldiketako eskolako presidenteak, klubeko azken ekintzen errepasoa egin du.

Irunen Memoria Historikoa landuko duen Scape Street edo kaleko ihes-joko batean parte hartuko dute Eguzkitzako BHI eta Toki Alai ikastetxeko 172 ikaslek egunotan. Hirugarren urtea da ikasturtean zehar liburuetan ikasitakoa esperientzien bidez eta gertakari historikoen lekuan berean sakontzeko Euskape enpresak sortutako joko honetan Irungo 4. DBHko ikasleek parte hartzen dutela. 

Ficobako arduradunek balorazio baikorra egiten dute, eta iazko hogeigarren urtemugako hobekuntza sendotutzat eman dute. Aurtengo lau bisitaritik hiru gipuzkoarra izan da, eta %91k ondo baloratu du Bioterrako azoka eta paraleloan antolatutako jarduera dibulgatibo desberdinak. Gehiengo batek (%87) hurrengo ediziora itzultzeko asmoa adierazi du. 

Argazki desberdin bezain desorekatua utzi dute Europako Parlamenturako hauteskundeek Bidasoaren bi ertzeetan. Hego Euskal Herrian bezala, Irunen PSOE gailendu da eta EH Bildu bigarren indarra izan da bertan eta Hondarribian, EAJk 2019an Bidasoaldean eskuratutako bozken erdia galdu duen bitartean. Hego Lapurdin, aldiz, eskuin muturra nagusitu da, Hendaia, Urruña eta Biriatu barne.  

Aljeriako errefuxiatu zelaietan haurren erdia desnutrizio egoeran dago, eta helduetan anemia kasuak ugaritzen doazen bitartean, Munduko Elikagai Programak bideratzen duen janari-saskia %30 murriztu die.

Txingudi BHI ikastetxeak Irungo agintariak, irakasleak, ikasleak eta gurasoak hausnartzera gonbidatu ditu adituen eskutik aurreneko aldiz, errealitate soziolingustikoaren erronkari neurri hartzeko asmoz. “Euskara eta Kulturartekotasuna Irungo ikastetxeetan” kafe tertulia abiapuntua besterik ez da izan, baina pista batzuk lortu dituzte etorri berri zein bertako ikasleen hizkuntza ohiturak aldatu eta euskara gaitasuna zuzentzeko bidean.

Hiru astez itxita egon ondoan, errepide-sarean ezinbesteko bidea dela frogatutzat eman du Hendaiako Herriko Etxeak. Egunero 9.000 autok erabiltzen duten heinean, Hondartza auzoko langile eta bizilagunengan eragin handia izan du maiatzaren 21az geroztik egindako itxierak. Gainera, auzoko komertzioen diru-sarrerak %30 apaldu dira.

Auzoan dagoen 400 metro koadroko baratze-lorategi zaharra «suntsitu» eta hiri-lorategi moderno bat egiteko proiektua geldiarazi dezala eskatu diote Hendaiako Herriko Etxeari. Kudeaketa kolektibotik belaunaldien arteko harremanak sustatuko dituen proiektu alternatiboa proposatzen dute, hamarkada luzeetan bertan garatu den biodibertsitatea atxikiz. Bertan dagoen garajeen eraikina ere, bizikletentzako aparkaleku aterpetu gisa baliatzea hobesten dute arrete minute ordez.

Svart Records zigilu finlandiarraren disko batzuk iritsi dira nere eskuetara, alde batetik kaleratu berriak diren AINO & HAJONEET eta LASTEN HAUTAUSMAA azken lanak eta beste aldetik finlandiar punkaren klasiko diren hainbat diskoren birrargitarapenak TV:N ORJAT, SUURKAUPUNGIN HAITAT, KOLLA KESTAA, SENSUURI, 013 eta RATSIA taldeetaz gozatuko dugu

Decathloneko langileek hirugarren lanuzte eguna dute larunbatean, eta 11:00etan "Prekarietatearen ginkana" egingo dute lan baldintza kaxkarrak irudikatzeko. 12:00tan, aldiz, Merkal Calzados enpresako langileek "Prekarietatearen ginkana" antzezlanarekin plazaratuko dute euren egoera, negoziaketarik gabe, hiru hilabeteko grebari eustea erabaki eta gero. 

Kolektibo feministetako bolondresek proposatuta, festa ondokoan etxera bakarrik ez joateko zerbitzua emango dute aurten aurreneko aldiz, Puntu Morean akonpainamendua eskatzen duenarentzat. Telefono Morea (607 07 02 02) ekainaren 14-15eko asteburuan, eta hilaren 22tik uztailaren 1era aktibatuko dute, eta indarkeria matxistak, alkohola eta droga kontsumoak prebenitzeko ekimen andana adostu dituzte jaietako dispositiboan.